RC-KILIMANJARO AWAFARIJI WALIOPATWA NA MAAFA WILAYANI HAI

Na Richard Mwangulube,Bomang'ombe

Mkuu wa mkoa wa Kilimanjaro,Mhe Leonidas Gama,Mwanzoni mwa wiki hii alitembelea vijiji vitano vya ukanda wa tambarare vilivyokumbwa na maafa ya mvua kubwa na upepo mkali katika wilaya ya Hai kwa lengo la kuwafariji waliokumbwa na maafa hayo.

Mhe Gama aliwafariji wananchi wa vijiji hivyo vya Shirimgungani,Mijongweni,Kwatito,Ngosero na Kikavu Chini.

Mkuu huyo wa mkoa aliwahakikishia wananchi hao kuwa serikali ipo pamoja nao katika kuhakikisha kuwa wanajikimu kimaisha kwa kuwa na mahitaji ya msingi ya chakula ambacho kitawapa nguvu ya kujipanga upya kwa maisha.

Aliuagiza uongozi wa wilaya kuangalia uwezekano wa kuwa na mbegu fupi za mahindi zinazokomaa kwa muda mfupi ili wananchi hao ambao hivi sasa wanajiandaa kwa msimu wa kilimo wawe na uhakika wa kupata mavuno ya kutosha.

Alisema kutokana na mazingira yanayojitokeza ya mvua za sasa kuja kwa kasi lolote linaweza kutokea likiwemo la mvua hizo kukata kwa muda mfupi.

Aidha Mheshimiwa Gama aliutaka uongozi wa wilaya sasa kuwa na programu ya kuhakikisha wananchi wanakuwa na nyumba imara ili kuepukana na maafa ya kila mwaka pale zinapojitokeza mvua kubwa zinazoambanatana na upepo

WILAYA YA HAI YAWEKA MIKAKATI YA KUSAIDIA WENYE HALI MBAYA ZAIDI KATIKA MAAFA

Bibi Aziza Mohammed katika pozi za kawaida kila anaposikia makundi mbalimbali yanatembelea eneo la maafa pamoja na mjukuu wake ambaye ana matatizo ya akili

Bibi Aziz Mohammed katika pozi jingine pamoja na mjukuu wake ndani choo  hapo wakiwa wamefunua mfuko wa saruji

ftt

Nyumba ya familia ya Bibi Aziza Mohammed baada ya kuezuliwa paa

Na Mwandishi Wetu,Hai

Baada ya maafa ya Mvua kubwa na upepo mkali iliyosababisha maafa katika maeneo mengi ya wilaya ya Hai,hali hiyo imeanza kutumia ndivyo sivyo na baadhi ya wananchi wakitegemea kunufaika na misaada mbalimbali.

Hali hiyo imekuwa ikitumiwa na mwanamama anayefahamika kwa jina la Aziza Mohammed ambaye kutokana na taharuki ya upepo na mvua hiyo alilazimika kukimbilia katika choo chake cha kisasa ambacho alijenga kikiwa imara kuliko hata nyumba ya kuishi siku chache kabla ya tukio.

Baada ya tufani hilo kutulia na makundi mbalimbali ya watu wakiwemo viongozi kuanza kutembelea tukio ndipo alipobaini kuwa kukaa kwake chooni kunaweza kumpatia misaada na kuamua kufanya hivyo kwa kila anapopewa taarifa ya ujio wa makundi hayo.

Tofauti na wenzake waliopata maafa ambao waliombewa makazi ama kukaribishwa kwa majirani,lakini  kwa Bibi Aziza ilikuwa ni patashika kukubali kufanya hivyo mpaka pale viongozi wa kata na kijiji pamoja na maofisa wa maendeleo ya jamii walipoenda kumshawishi na kukubali kuhama.

Hata hivyo hakuweza kuridhika baada ya kubaini kuwa atapatiwa msaada wa bati wa kutosheleza vyumba viwili ambavyo vitajengwa kwa kununuliwa tofali za kuchoma na wasamaria wema na hivyo kukubali kurudishwa na baadhi ya waandishi wa habari ili kwenda kupigwa picha kule chooni akichukuliwa kutoka kule alikopewa hifadhi.

Hatua hiyo ilijitokeza baada ya kutoridhika na vyumba viwili na kuwaeleza waandishi wa habari hao kuwa mkoa na wilaya umeshindwa kumsaidia na hivyo anamsubiri Waziri mkuu Mizengo Pinda

"Ni kweli ilikuwa ni patashika kumwamisha huyo mama kutokana na mtazamo wake kwamba akiishi hapo chooni baada ya nyumba yake kuezuliwa paa atapata misaada,lakini viongozi wa kitongoji,kijiji na wa maendeleo ya jamii walimwelimisha baadaye alikubali,lakini cha ajabu,leo waandishi wa habari hao wamemchukuwa na kumrudisha kule chooni ili kupata picha" alisema mmoja ya viongozi wa kitongoji

Mkuu wa wilaya ya Hai,Novatus Makunga ameeleza kuwa serikali wilayani humo kwa kushirikiana na mbunge wa jimbo la Hai,Freeman Mboye wameweka mazingira ya dharura ya kusaidia kaya ambazo makazi yao yapo katika hali mbaya yakiwemo ya Bibi Aziza na wengine wengi kwa kutenga fedha za kununua matofali ya kuchoma.

Makunga ameeleza kuwa pamoja na kuwepo kwa msaada wa mabati 200 kutoka kwa Mwenyekiti wa makampuni ya IPP kupitia Bonite Bottlers,lakini ni vigumu kuezeka katika nyumba nyingi kutokana na kukosa uimara ikiwemo aliyekuwa akiishi Bibi Aziza na hivyo wanajipanga kumnunulia tofali imara za kuchoma za vyumba viwili.

Lakini pia alisema kuwa msaada kama huo utapelekwa kwa mzee aliyemtaja kwa jina moja la mzee Omar wa kitongoji cha kijiweni ambaye hana msaada kabisa pamoja na mama mjane wa kijiji cha Kikavu Chini ambaye atapatiwa bati lakini kijiji kimekubali kufanya harambe ya kumsaidia kukamilisha nyumba yake.

Makunga ameeleza kutokana na uchache wa msaada hasa bati bado uchanganuzi unafanyika ili kuweza kuzigawa kwa wale ambao wana hali mbaya zaidi.

Aidha Makunga amefafanua kwamba serikali wilayani humo haijawahi kuwaleta waandishi wa habari kupiga picha jinsi wananchi wanavyoishi bali kama ilivyo kwa majukumu ya waandishi wa habari kufanyakazi bila ya mipaka wamekuwa wakija na wasamaria wema wanaoleta misaada kwa lengo la kutaka kujua hali hali ya maafa hayo

TAARIFA YA MAAFA YA MVUA NA UPEPO MKALI WILAYANI HAI - FEBRUARI 2014

Mkuu wa wilaya ya Hai,Novatus Makunga akipokea Shehena ya Unga wa Sembe kutoka kwa viongozi wa Kiwanda cha vinywaji barid cha Bonite cha mjini Moshi

Mkuu wa wilaya ya Hai,Novatus Makunga[Kulia] akipokea msaada wa mabati kutoka kwa viongozi wa kiwanda cha Bonite Bottlers cha mjini Moshi

Viongozi mbalimbali wa wilaya ya Hai wakiwa katika maeneo ya maafa kuwafariji wananchi

Wafanyakazi wa kiwanda cha vinywaji baridi cha Bonite wakishusha shehena ya mabati katika kijiji cha Shirimgungani

Wafanyakazi wa kiwanda cha Bonite wakishusha shehena ya unga wa sembe

Nyumba iliyokumbwa na maafa katika kijiji cha Mijongweni

Nyumba ambayo imefumuliwa paa kutokana na mvua kubwa iliyoandamana na upepo

Moja ya majengo ya shule yaliyoezuliwa paa katika eneo la Modio

TAARIFA YA MAAFA YALIYOTOKANA NA MVUA ZILIZOAMBATANA NA UPEPO MKALI WILAYANI HAI.

Wilaya ya Hai kwa nyakati tofauti tofauti imekumbwa na upepo mkali uliombatana na mvua. Mvua hiyo na upepo huo ulisababisha maafa makubwa ikiwemo kuezua,kubomoa kuta za nyumba na kuharibu mashamba ya mazao mbalimbali. Kata nane katika Wilaya ya Hai ndizo zilizokumbwa na maafa hayo zikijumuisha jumla ya vijiji 25.Tathmini  iliyofanyika imeonesha kuwa madhara  mengi yaliyotokea ni ya kuezuliwa kwa mapaa, kubomolewa kwa kuta za nyumba na kuharibiwa kwa mazao haswa migomba.Hali hii imesababisha baadhi ya kaya kukosa mahali pa kulala na kujihifadhi kwa majirani. Maeneo na madhara yaliyotokea ni kama ilivyooneshwa katika Jedwali Namba I hapa chini:

Jedwali Na, I  

	Kata	Kijiji	Tarehe ya  Maafa	Aina ya madhara yaliyotokea
1.	Machame Kusini	Kwatito	06/02/2014	Kuezuliwa kwa mapaa ya nyumba, kubomoka kwa kuta za nyumba.
		S/mgungani	06/02/2014	Kuezuliwa kwa mapaa ya nyumba, kubomoka kwa kuta za nyumba, kuharibiwa kwa migomba
2.	Machame Weruweru	Mijongweni	06/02/2014	Kuezuliwa kwa mapaa ya nyumba,  kubomoka kwa kuta za nyumba. Kuharibiwa kwa mashamba ya mpunga  na kung’oka kwa miti.
		Ngosero	06/02/2014	Kuezuliwa kwa mapaa ya nyumba, kubomoka kwa kuta za nyumba.
		Kikavuchini	17/01/2014	Kuezuliwa kwa mapaa ya nyumba, kubomoka kwa kuta za nyumba
3	Masama Rundugai	Chemka	07/02/2014	Kuezuliwa kwa mapaa ya nyumba, kubomoka kwa kuta za nyumba
		Rundugai	07/02/2014	Kuezuliwa kwa mapaa ya nyumba, kubomoka kwa kuta za nyumba.
		Chekimaji	07/02/2014	Kuezuliwa kwa mapaa ya nyumba, kubomoka kwa kuta za nyumba.
		Kawaya	07/02/2014	Kuezuliwa kwa mapaa ya nyumba, kubomoka kwa kuta za nyumba.
4	Masama Kusini	Kwasadala	10/02/2014	Kuezuliwa kwa mapaa ya nyumba, kubomoka kwa kuta za nyumba, kuanguka kwa miti na nguzo za umeme
		Kware	10/02/2014	Kuezuliwa kwa mapaa ya nyumba, kubomoka kwa kuta za nyumba, kuanguka kwa miti na kuharibiwa kwa  mashamba ya migomba
		Mungushi	10/02/2014	Kuezuliwa kwa mapaa ya nyumba, kubomoka kwa kta za nyumba na kuanguka kwa kuta za nyumba,kuanguka  kwa miti na vyakula kuharibika
5	Masama  Mashariki	Roo	10/02/2014
6	Masama Magharibi	Mashua	08/02/2014 mpaka  10/02/2014	Kuezuliwa kwa mapaa ya nyumba, baadhi ya nyumba kuangukiwa na miti na migomba kuangushwa na  kuharibiwa na upepo.
		Lukani	08/02/2014 mpaka  10/02/2014	Migomba kuangushwa na kuharibiwa na  upepo.
		Kyuu	08/02/2014 mpaka  10/02/2014	Kuezuliwa kwa mapaa ya nyumba, kuanguka kwa miti na vyakula kuharibika.Kuharibiwa kwa migomba.
		Nkwansira	08/02/2014 mpaka  10/02/2014	Kuezuliwa kwa mapaa ya nyumba, baadhi ya nyumba kuangukiwa na miti  na migomba kuangushwa na kuharibiwa na upepo.
		Losaa	08/02/2014 mpaka  10/02/2014	Migomba kuangushwa na kuharibiwa  na upepo.
7	Hai Mjini	Lerai	17/01/2014	Kuezuliwa kwa mapaa ya nyumba, kung’oka kwa miti ya asili
		Kilimambogo	17/01/2014	Kuezuliwa kwa mapaa ya nyumba
8	Masama Kati	Mbosho	10/02/2014	Kuezuliwa kwa mapaa ya nyumba, baadhi ya nyumba kuangukiwa  na miti na migomba kuangushwa na kuharibiwa na upepo.
		Mroma	10/02/2014	Kuanguka kwa miti na kuharibiwa kwa  mashamba ya migomba
		Lemira Kati	10/02/2014	Kuanguka kwa miti na kuharibiwa kwa  mashamba ya migomba
		Isuki	10/02/2014	Kuanguka kwa miti na kuharibiwa kwa  mashamba ya migomba
		Ng’uni	10/02/2014	Kuanguka kwa miti na kuharibiwa kwa  mashamba ya migomba

Jedwali namba II hapa chini tunaonesha idadi ya kaya, watu walioathirika, na vifaa vya ujenzi vinavyohitajika kuwasaidia wahanga hao na thamani yake

Jedwali Na. II

	Kata	Kijiji	Kaya	Idadi ya watu	bati	Chakula (KG) /mwezi	Mbao	Tofali
	Machame Kusini	Kwatito	43	181	480	2172	824	24,600
		Shirimgungani	08	49	86	588	128
	Machame Weruweru	Mijongweni	24	146	269	288	237
		Ngosero	11	44	62	132	413
		Kikavuchini	18	90	280	1180	384
	Masama Rundugai	Chemka	3	20	68	432	150	600
		Rundugai	3	16	88	193	116	1200
		Chekimaji	5	26	11	312	65	300
		Kawaya	2	6	11	24	11	180
	Masama Kusini	Kwasadala	46	186	711	2232	219	2543
		Kware	40	200	527	2400	378
		Mungushi	10	58	92	696	115
	Masama Mashariki	Mudio	15	52	336	624	505	331
		Mbweera	1	3	6	36	12
	Masama Magharibi	Mashua	8	27	152	324	206	296
		Kyuu	6	30	55	360	24
		Nkwansira	4	24	48	288	104
	Hai Mjini	Lerai	3	17	32	204	56
		Kilimambogo	5	27	48	324	39
	Masama Kati	Mbosho	7	28	149	336	373	210
JUMLA  KUU  YA  MAHITAJI			262	1,230	3,511	12,640	4,359	30,260

Mvua na upepo uliotokea umesababisha  uharibifu majengo ya shule nane za sekondari na msingi katika kata saba za Wilaya yetu.

 

Maafa haya pamoja na kwamba yamesababisha uharibifu mkubwa wa nyumba,mashamba ya mazao mbalimbali na barabara, yalisababisha pia kifo cha mwananchi mmoja mwendesha pikipiki, Ndg Gabriel Mboya (miaka 46) katika kijiji cha Mijongweni tarehe 7/2/2014 baada ya kusombwa  na maji wakati akijaribu kuvuka korongo lilolokuwa likitiririsha maji ya mvua.

Hatua zilizochukuliwa kukabiliana na maafa haya:

Uongozi wa Wilaya umetembelea maenaeo yaliyoathirika na kuwafariji wananchi na kushauri Serikali za vijiji kusaidiana na jamii katika kuwasaidia waathirika wa maafa .

• Tathimini ya athari za maafa ilianza kufanyika na inaendelea.
• Uongozi wa Wilaya umewakutanisha wadau mbalimbali na kuwafahamisha hali ilivyo pamoja na kuwaomba misaada kwa ajili ya kuwasaidia waathirika wa maafa.
• Baadhi ya wadau wameanza kutoa misaada na tarehe 18/02/2014, msaada uliotolewa na Kampuni ya “Bonite Bottlers”  ambao ni unga kilo 2500 na maharagwe kilo 1000 umegawanywa kwa waathirika wa maafa katika kata za Machame Kusini na Machame Weruweru.Msaada wa bati 200 uliotolewa na “Bonite Bottlers”  utagawanya baada ya mhandisi kufanya uhakiki wa mahitaji ya mabati kwa waadhirika.
• Chama Kikuu cha Ushirika Mkoani Kilimanjaro(KNCU) nayo kupitia mwenyekiti wake Ndugu Menald Swai kilitoa msaada wa shilingi milioni moja
• Baadhi ya ndugu wa waathirika wa maafa wamejitolea misaada mbalimbali ikiwemo ya chakula na ukarabati wa nyumba zlizoharibiwa.
• Msaada mwingine  ni wa tarehe 20/02/2014 ambao ni tani nne za unga wa mahindi toka kampuni ya MONOBAN ya jijini Arusha zilizokabidhiwa na Mkurugenzi mkuu wa kampuni hiyo Ndugu Godfrey Mollel pamoja na Shilingi milioni moja ya kununulia maharage.Msaada huo umeanza kusambazwa  katika kata za Masama Rundugai,Masama Mashariki,Masama Magharibi na Masama Kati.Aidha tarehe 21/2/2014 tutamalizia kutoa msaada katika kata ya Hai Mjini mitaa ya Lerai na Kilimambogo.

Mvua iliyoambatana na upepo mkali na kusababisha maafa imetokea baada ya kipindi kirefu cha ukame na wakati Wilaya ina upungufu wa chakula wastani tani 648 za wanga na tani 65 za protini  katika maeneo ya tambarare.Tathmini ya kina inaendelea kufanyika ilikupata takwimu halisi za hali  ya chakula hapa wilayani.

Aidha ,hali ya chakula kiwilaya  ni ya kuridhisha katika maeneo ya milimani hali inayojidhiirisha kwa bei ya vyakula masokoni ambayo haijapanda sana.Bei ya vyakula muhimu katika masoko yetu ni kama ifuatavyo:

• Mahindi               Kg.  1               Tshs 400   - 550
• Maharage             Kg.  1              Tshs  1000 - 1200
• Mchele                 Kg.  1              Tshs  800  -  1350
• Ndizi                    Mkungu           Tshs  5000 -10000

Tunapenda kuishukuru serikali kwa kuipati Wilaya  chakula cha msaada kiasi cha tani 201.8 ambazo tani 20.2 ni kwa ajili ya wananchi wa sio na uwezo kabisa na tani 181.6 ni za kuuza kwa Tshs 50 kwa kilo. Chakula  kilipokelewa na kusambazwa kwa wananchi

HITIMISHO

Kwa upande wa Maafa,bado misaada inahitajika zaidi kwa walioathirika ambao hivi sasa wengi wameanza matayarisho ya kilimo kutokana na mvua ambazo zimeanza kunyesha,hivyo tunatoa wito kwa wasamaria wema kujitolea kwa hali na mali kuwasaidia ndugu zenu wa wilaya ya Hai ambao wana mahitaji makubwa wa kibinadamu.

Novatus Makunga

Mkuu wa wilaya

20/2/2014