RAIS KIKWETE AAGIZA KUHARAKISHWA KWA UJENZI BARABARA YA KWASADALA-MASAMA

 Rais Jakaya Kikwete akiwasili katika kijiji cha Roo kwa ajili ya uzinduzi wa barabara ya Kwasadala-Masama wilayani Hai

 Rais Jakaya Kikwete akiwa katika picha ya pamoja na viongozi mbalimbali wa mkoa wa Kilimanjaro pamoja na wilaya ya Hai pamoja na wabunge mara baada ya uzinduzi wa barabara ya Kwasadala-Masama

 Rais Jakaya Kikwete akizindua moja ya mtambo utakaotumika katika kazi ya ujenzi wa barabara hiyo

Rais Jakaya Kikwete akizindua rasmi ujenzi wa barabara ya Kwasadala-Masama(Picha zote kwa hisani ya Ikulu)

Na Mwandishi wetu,Hai

Rais Jakaya Kikwete ameagiza ujenzi wa Barabara ya Kwasadala hadi Masama,wilayani Hai mkoani Kilimanjaro uanze kwa kasi kwa kurekebishwa dosari zote zilizojitokeza.

Rais Kikwete ametoa agizo hilo katika Kijiji cha Roo kilichopo katika kata ya Masama Mashariki, wilayani humo wakati anaweka jiwe la msingi la ujenzi wa barabara hiyo.

Rais Kikwete alisema ujenzi wa barabara hiyo aliamua yeye ijengwe kwa sababu katika wilaya nzima ya Hai, eneo la Masama ndilo pekee ambalo halikuwa na barabara ya lami.

“Kazi imeanza, lakini kwa bahati mbaya imechelewa sana, sitaki kuingia kwenye sababu za kuchelewa na kwamba nilipoanza ziara niliarifiwa hakuna kinachoendelea,” alisema.

Alisema kuwa licha ya kudokezwa hivyo,aliamua lazima aweke jiwe la msingi na anaamini dosari zilizojitokeza zitamalizwa na ujenzi uanze kwa kasi kama ilivyotarajiwa.

Aidha Rais Kikwete aliagiza wizara ya ujenzi kuhakikisha barabara hiyo inaunganishwa kwa kiwango cha lami na barabara inayokwenda Machame kwa upande wa mashariki pamoja na Barabara ya Sanya juu inayounganisha kati ya Bomang’ombe na wilaya ya Siha kwa upande wa magharibi.

Akitoa taarifa ya ujenzi wa barabara hiyo,waziri wa Ujenzi  Dk John Magufuli aliipa Kampuni ya Atlantic Market Ltd inayojenga barabara hiyo siku 60 za kuwasilisha kwake mpango wa jinsi itakavyokamilisha ujenzi wa barabara hiyo

Dk Magufuli aliiagiza vyombo vyote vinavyowasimamia makandarasi pamoja na wahandisi ikiwemo bodi ya wakandarasi nchini (CRB) kuichukulia hatua kampuni hiyo iwapo ndani ya siku hizo 60, itakuwa haijawasilisha mpango wa kukamilisha ujenzi wa barabara hiyo ya kilomita 12.5.

Waziri huyo alifafanua kwamba ujenzi wa barabara hiyo kwa kiwango cha lami kwa gharama ya Sh5.4 bilioni ulianza Mei 2010 na ulitakiwa uwe umekamilika na kukabidhiwa mwezi Mei mwaka jana.

Dk Magufuli ameeleza kuwa mkandarasi wa kampuni hiyo ambayo mkurugenzi mkuu wake ni Gabriel Mrema aliyekuwapo wakati wa uzinduzi huo ameshalipwa Sh1.6 bilioni na ameshatengeneza certificate (vyeti) saba na zote amelipwa, kwa hiyo haidai serikali kwa kazi aliyofanya.

 ”Nina kuahidi mheshimiwa Rais mara utakapoondoka Mimi,Mkandarasi na mtaalamu mshauri tukakomeshana na kamwe sitakubali kutimuliwa kazi kwa ajili ya uzembe wake kabla mimi hujanifukuza,yeye nitakuwa nimeshamtema,”alisisitiza waziri Magufuli

Huku akishangiliwa na wananchi, Dk Magufuli alisema yeye hayupo tayari kufukuzwa kazi kwa sababu ya kilomita 12.5, hivyo anataka wahusika wawe wametangulia kufukuzwa.

Waziri Magufuli alisema baada ya Rais kuondoka eneo hilo, bodi ya wakandarasi na Mtendaji Mkuu wa Wakala wa Barabara (Tanroads), watakaa na mkandarasi kujua watakavyoshughulika naye.

“Nakupa siku 60 uje na mpango wa kukamilisha barabara hii, usipofanya hivyo bodi ya makandarasi ianze kukushughulikia ikiwezekana ufutwe kabisa ukandarasi ili ukavue samaki,” alisema.

Alisema haiwezekani mkataba unasainiwa, mkandarasi anafanya kazi hovyohovyo kwa kutengeneza kilomita nne za lami kwa miaka mwili, huku akihoji kama angepewa kilomita 100 ingekuwaje.

Dk Magufuli alisema huo ni mfano wa makandarasi wazalendo ambao hivi karibuni walilalamika mbele ya Rais Kikwete kuwa, wananyimwa kazi na serikali na kupendelea kampuni za nje.

Alitumia fursa hiyo kumweleza Mbunge wa Hai,Mheshimiwa Freeman Mbowe aliyekuwa ameketi jukwaa kuu kuwa, angalau sasa amefahamu mkandarasi ni tatizo katika kukamilisha barabara hiyo kwa wakati.

Aidha Dk Magufuli alimpongeza Mheshimiwa Mbowe kwa kutambua na kukiri hadharani kazi kubwa ya kuboresha huduma za kijamii inayofanywa na Rais Kikwete na kumtaka ajitahidi kuwaelimisha viongozi wenzake wa vyama vya upinzani.

“Mheshimiwa Mbowe leo umeongea maneno ya utukufu ambayo yanakubalika hata kwa mwenyezi Mungu,wewe kama kiongozi wa kambi ya upinzani bungeni na mwenyekiti wa Chadema ni vyema sasa ukawaelimisha na wenzako wachache wanaojifanya hawaoni kazi zinazofanyika,”alifafanua Dk Magufuli.

Kwa upande wake Mheshimiwa Freeman Mbowe alimpongeza Rais Kikwete kwa uchapaji kazi ambao umewezesha nchi kuwa na miondombinu bora ikiwemo ya barabara.

“Mimi ninasafiri karibu nchi nzima kwa njia mbalimbali yaani ndege na magari,jamani mnyonge mnyongeni lakini haki yake mpeni,Rais Kikwete anastahili kupewa sifa kwa kazi kubwa anayoifanya.

Mbunge huyo wa Hai pia alitumia firsha hiyo kutoa ombi kwa Rais Kikwete la kuongeza kipande cha urefu wa barabara hiyo kwa kilometa nne ili kiweze kuunganishwa na barabara nyingine ya Machame.

Kadhalika Mheshimiwa Mbowe alimuomba Rais kuingilia kati madai ya fidia ya wananchi wapatao 390 waliokuwa wanamiliki ardhi katika mji wa Bomang’ombe ambao waliamishwa kwa ajili nya kujengwa kwa mji huo ambao ni makao makuu ya wilaya ya Hai.

RATIBA YA TUME YA KURATIBU MAONI YA KATIBA

RATIBA YA TUME YA KURATIBU MAONI YA KATIBA KATIKA WILAYA YA  HAI

TAREHE	MUDA	KATA HUSIKA	KATA ZA NYONGEZA	KITUO CHA MKUTANO
21/10/2012	03:00 – 06:00	HAI MJINI	MASAMA KUSINI	DOUBLE ROAD
21/10/2012	08:00 – 11:00	MASAMA RUNDUGAI		SOKONI
22/10/2012	03: 00 – 06:00	MACHAME KUSINI	MACHAME WERUWERU	MAILI SITA
22/10/2012	08:00 – 11:00	MACHAME MASHARIKI	MACHAME NARUMU	LYAMUNGO KATI
23/10/2012	03:00 – 06:00	MACHAME MAGHARIBI	MACHAME UROKI	BWANI
23/10/2012	08:00 – 11:00	MACHAME KASKAZINI		BARAZANI
24/10/2012	03:00 – 06:00	MASAMA MASHARIKI	MASAMA KATI	MUDIO
24/10/2012	08:00 – 11:00	MASAMA MAGHARIBI		LUKANI

BIBI WA KIJERUMANI AIPIGA JEKI SHULE YA MSINGI CHEMKA

 Bibi Elisabeth Dorr akipokeza zawadi ya kitenge na mkeka kutoka kwa wananchi wa kijiji cha Chemka

 Mkuu wa wilaya ya Hai,Novatus Makunga mara baada ya kupokea majengo ya shule ya msingi ya Chemka yaliyofadhiliwa na Bibi Elisabeth Dorr.Wengine katika picha ni mkurugenzi wa Shirika la AKO-Moshi, Klaus Peter Kiefe(wa saba kulia),mwalimu kutoka Ujerumani Barbara(wa sita kutoka kulia) na Oscar wa tatu kulia.

 Mgeni rasmi katika hafla ya kupokea majengo ya shule ya msingi ya Chemka Novatus Makunga akiwa na washirika wa maendeleo kutoka Ujerumani wakiongozwa na Bibi Elisabeth Dorr

 Sehemu ya jengo la bwalo la chakula la shule ya msingi ya Chemka lililojengwa na bibi Elisabeth Dorr

 Mabenchi na meza katika bwalo la chakula shule ya msingi ya Chemka

 Bibi Elisabeth Dorr akikumbatiana na baadhi ya akinamama wa kijiji cha Chemka baada ya kufurahishwa na zawadi mbalimbali

Na Richard Mwangulube,Hai

Shule ya Msingi ya Chemka iliyopo nje kidogo wa mji wa Bomang’ombe wilayani Hai,mkoani Kilimanjaro imepokea majengo yaliyojengwa na Bibi Kizee wa Kijerumani Elisabeth Dorr(89) kupitia shirika la Ako lililoko mjini Moshi.

Shule hiyo iliyopo katika kijiji cha Chemka ilipata ufadhili huo mwaka 2008 kupitia kanisa katoliki parokia ya Chekereni kupitia shirika la AKO-Moshi

Majengo hayo ni pamoja na madarasa matatu,nyumba mbili za walimu,bwalo la chakula,stoo na ofisi ya shule pamoja na kugharamia uunganishaji wa umeme na kuvuta maji ya bomba ambapo Bibi Dorr alitoa jumla ya Euro 50,000 ambazo ni sawa na shilingi 93,554,698.

Mwalimu mkuu wa shule hiyo,David Mosha ameeleza kuwa Bibi huyo wa Kijerumani pia katika fedha hizo alitoa madawati 66,meza 4,viti 4,makabati 7 ya ukutani,sufuria mbili kubwa,beta stoves 2,meza na benchi 15 kwa ajili ya matumizi ya bwalo

Mosha ameeleza kuwa awali Bibi huyo alijenga darasa moja mwaka 2008 na baadaye mwaka uliofuata alimtuma mwenyekiti wa Shirika la AKO-Tanzania,Klaus Boehme na kufurahishwa na usimamizi wa miradi hiyo shuleni hapo.

Aidha Mosha ameeleza kuwa mkuu wa AKO-Moshi alitoa michoro ya ramani tatu za ukutani na michoro sita ya somo la sayansi na kibao cha shule vikigharimu shilingi 800,000/=

Ameeleza kuboreshwa kwa shule hiyo kumeinua kiwango cha ufaulo ambapo mwaka 2008 asilimia 78 waliweza kufaulu,mwaka 2009 asilimia 79,mwaka 2010 asilimia 69 na mwaka jana asilimia 66 huku akieleza kwa mwaka huu wanatarajiwa ufaulu kuwa asilimia 100

Akipokea rasmi miradi hiyo,Mkuu wa wilaya ya Hai Novatus Makunga amewataka wakazi wa kijiji cha Chemka kuyatunza majengo hayo kwa nguvu zao zote na pia kuhakikisha wanaingia katika kampeni ya kupanda miti kutokana na eneo hilo kunyemelewa na jangwa kutokana na kuwa na idadi kubwa ya mifugo

Aidha Makunga amewataka kutumia fursa ya vyumba bora na vizuri pamoja na umeme kuchangia ununuzi wa kompyuta kwa ajili ya kuanzisha darasa la kompyuta pamoja na kurahisisha kazi za utawala.

Aliahidi kuchangia kompyuta moja kwa ajili ya kuanzia na kuongeza kuwa siyo kwamba kukiamilika kwa majengo hayo kutaifanya shule hiyo kufanana na shule za mjini lakini pia kutawaingia katika mazingira ya kisasa ya teknolojia zinazotumika katika maeneo ya mjini

RC GAMA AZITAKA HALMASHAURI KUFUFUA ZAO LA KAHAWA

Mkuu wa mkoa wa Kilimanjaro Mhe Leonidas Gama(Mwenye suti ya Kijivu) akipata maelezo ya utafiri wa miche bora ya kahawa kutoka kwa wataalamu wa Tacri

Mmoja kati ya wafanyakazi wanaosaidiana na wataalamu wa Tacri katika kuzalisha miche bora ya Kahawa

Mkuu wa mkoa wa Kilimanjaro Mhe Leonidas Gama akishuhudia baadhi ya miche iliyozalishwa na Tacri ikiwa  tayari kwa ajili kwa ajili ya kusambazwa kwa wakulima kwa ajili ya kuoteshwa

Mkuu wa mkoa wa Kilimanjaro Mhe.Leonidas Gama(Katikati) na mkuu wa wilaya ya Hai,Mhe Novatus Makunga(kulia) akipata maelezo kuhusiana na msitu wa asili unaotunza na Tacri kutoka kwa mtaalamu wa taasisi hiyo

Na Mwandishi Wetu,Hai

Mkuu wa mkoa wa Kilimanjaro,Mhe Leonidas Gama ametangaza mkakati maalumu wa kufufua zao la kahawa katika mkoa huo kwa kuitumia ipasavyo Taasisi ya utafiti wa Kahawa Nchini(TACRI) ambayo ipo wilayani Hai Mkoani Kilimanjaro.

Mkuu huyo wa mkoa ametoa kauli hiyo katika ziara yake wilayani Hai ambapo katika ziara hiyo ya siku tatu alipata fursa ya kutembelea taasisi hiyo na kujionea shughuli mbalimbali za utafiti wa zao la Kahawa.

Mhe. Gama ameeleza kuwa halmashauri zote saba za wilaya katika mkoa wa Kilimanjaro zitalazimika kuandaa mkakati wa kukitumia kituo hicho katika kufufua zao la kahawa ambalo kilimo chake kimeporomoka sana mkoani humo.

“Ukizungumzia Kilimanjaro ni kahawa na ukizungumzia kahawa ni Kilimanjaro hivyo ni vyema sasa tukaja na mkakati kabambe wa kufufua zao hilo kwa ajili ya kuinua uchumi wa wananchi wetu,mkoa na taifa kwa ujumla,”alisisitiza

Mhe. Gama ameeleza kuwa tayari wilaya kama ya Mbinga mkoani Ruvuma imeweza kuinua zao la Kahawa kutokana na halmashauri ya wilaya hiyo kukitumia vyema kituo cha utafiti wa kahawa kilichoko wilayani humo.